తెలంగాణపై బీజేపీ దూకుడు రాజకీయం!

బీజేపీ జాతీయ కార్యవర్గ సమావేశాలు ఢిల్లీలో రెండు రోజులపాటు జరిగాయి. ఈ ఏడాది జరిగే 9 రాష్ట్రాల ఎన్నికల్లో అనుసరించాల్సిన వ్యూహాలపై ప్రధానంగా చర్చ సాగింది. మరీ ముఖ్యంగా తెలంగాణ విషయంలో మరింత దూకుడుగా ముందుకు వెళ్లాలని డిసైడ్ అయినట్లు తెలుస్తోంది. మీటింగ్ తర్వాత బీజేపీ రాష్ట్ర అధ్యక్షుడు బండి సంజయ్, కేంద్రమంత్రి కిషన్ రెడ్డి మీడియాతో మాట్లాడారు. కేసీఆర్ పాలనకు చరమగీతం పాడడమే తమ లక్ష్యమని తేల్చి చెప్పారు.

మోడీ స్ఫూర్తితో తెలంగాణలోనూ బీజేపీ ప్రభుత్వం ఏర్పాటు చేస్తామని ధీమా వ్యక్తం చేశారు బండి సంజయ్. ప్రజా సంగ్రామ యాత్ర విషయంలో అధిష్టానం ప్రత్యేక శ్రద్ధ పెట్టిందని తెలిపారు.పార్టీ బలోపేతం కోసం కృషి చేస్తున్న బీజేపీ కార్యకర్తలను మోడీ అభినందించారని చెప్పారు. ఆయన ఇచ్చిన జోష్ తో రాష్ట్రంలో మరింత ముందుకెళ్తామని ధీమా వ్యక్తం చేశారు. సమావేశాల సందర్భంగా బండి స్పీచ్ స్పెషల్ ఎట్రాక్షన్ గా నిలిచింది.

ఇక కిషన్ రెడ్డి మాట్లాడుతూ.. రాష్ర్టాన్ని దోపిడీ చేసిన ముఖ్యమంత్రి కేసీఆర్.. దేశాన్ని కూడా దోపిడీ చేసేందుకు బీఆర్ఎస్ పార్టీ పెట్టారని ఆరోపించారు. ఎన్ని సభలు, సమావేశాలు పెట్టినా కల్వకుంట్ల కుటుంబం ఫాంహౌస్ కు వెళ్లడం ఖాయమని వ్యాఖ్యానించారు. బీజేపీ జాతీయ కార్యవర్గ సమావేశాలలో అనేక కీలక నిర్ణయాలు తీసుకున్నామని చెప్పారు. బీజేపీ జాతీయ అధ్యక్షులు జేపీ నడ్డా నాయకత్వంలోనే లోక్ సభ ఎన్నికలకు వెళ్తామన్నారు. ప్రభుత్వ పథకాలు, అభివృద్ధి కార్యక్రమాలను ప్రజల్లోకి తీసుకెళ్లాలని ప్రధాని నరేంద్ర మోడీ తమను ఆదేశించారని చెప్పారు.

మరోవైపు కేంద్ర హోంమంత్రి అమిత్ షా టూర్ కూడా కన్ఫామ్ అయింది. ఈనెల 28న ఆయన ఆదిలాబాద్‌ జిల్లాకు రానున్నారు. పార్లమెంట్ నియోజకవర్గాల బలోపేతంపై దృష్టిపెట్టిన బీజేపీ.. తొలిసభను అక్కడినుంచే నిర్వహించాలని నిర్ణయించింది. ఇందులో భాగంగా ఆదిలాబాద్‌ జిల్లా పార్టీ కార్యాలయంలో ఆదిలాబాద్‌, నిర్మల్‌, ఆసిఫాబాద్‌ జిల్లా కోర్‌ కమిటీ సభ్యుల సమావేశం ఏర్పాటు చేశారు. అలాగే గ్రామగ్రామాన పార్టీ బలోపేతంపై మరిన్ని కార్యక్రమాలకు శ్రీకారం చుట్టనున్నారు. షా టూర్ తర్వాత మోడీ కూడా తెలంగాణ వచ్చే అవకాశం ఉంది.