Advertisement
ఢిల్లీ లిక్కర్ స్కాంలో దర్యాప్తు సంస్థలు దూకుడును కొనసాగిస్తున్నాయి. రోజుకో పరిణామంతో ఈ కేసు ఓ కొలిక్కి వస్తున్నట్టు కనిపిస్తోంది. ఈమధ్యే ఛార్జ్ షీట్ లో ఢిల్లీ సీఎం కేజ్రీవాల్ ప్రస్తావన తీసుకొచ్చారు అధికారులు. అప్పటినుంచి కేసు మరింత ఇంట్రస్టింగ్ గా మారింది. ఇప్పటివరకు ఉపముఖ్యమంత్రి మనీశ్ సిసోడియా ఈ కేసులో దర్యాప్తు ఎదుర్కొంటుండగా.. ముఖ్యమంత్రి పేరు కూడా తెరపైకి రావడంతో ఎప్పుడేం జరుగుతుందో అనే ఉత్కంఠ నెలకొంది.
Advertisement
ఈ కేసులో ఇప్పటిదాకా 9 మంది అరెస్ట్ అయ్యారు. వారిలో ఆప్ తో సత్సంబంధాలు ఉన్న విజయ్ నాయర్ ఉన్నారు. అలాగే, సౌత్ గ్రూప్ గా చెబుతున్న కొందర్ని అదుపులోకి తీసుకున్నారు. వారిలో తెలంగాణ నుంచి ఇద్దరు, ఏపీ నుంచి ఒకరు ఉన్నారు. అరెస్ట్ అయిన వారు బెయిల్ కోసం విశ్వ ప్రయాత్నాలు చేస్తుండగా.. అధికారులు మాత్రం వారిని వదలడం లేదు.
తాజాగా బీఆర్ఎస్ ఎమ్మెల్సీ కవిత మాజీ ఆడిటర్ గోరంట్ల బుచ్చిబాబు కస్టడీని పొడిగించాలని కోర్టును కోరారు సీబీఐ అధికారులు. శనివారంతో ఇంతకుముందు విధించిన కస్టడీ ముగియడంతో అతన్ని ఢిల్లీలోని రౌస్ ఎవెన్యూ కోర్టులో హాజరుపరిచారు. ఈ సందర్భంగా దర్యాప్తు పురోగతిని సీబీఐ అధికారులు వివరించారు. బుచ్చిబాబు కస్టడీ పొడిగించాలని కోరగా అందుకు అంగీకరించింది న్యాయస్థానం. మరో 14 రోజుల కస్టడీ పొడిగిస్తూ నిర్ణయం తీసుకుంది. తదుపరి విచారణను మార్చి 9కి వాయిదా వేసింది.
Advertisement
ఢిల్లీ మద్యం కుంభకోణం కేసులో తెలంగాణ నుంచి అభిషేక్‌ బోయినపల్లి తర్వాత సీబీఐ అరెస్టు చేసిన రెండో వ్యక్తి బుచ్చిబాబే. ఇతనికి ప్రముఖులతో పరిచయాలు ఉండడంతో ఏం జరుగుతుందో అనే ఉత్కంఠ ఉంది. ఈనెల 8న విచారణ పేరుతో బుచ్చిబాబును ఢిల్లీకి పిలిపించుకుంది సీబీఐ. అదేరోజు రాత్రి అదుపులోకి తీసుకుంది. గతంలో సీబీఐ, ఈడీ బుచ్చిబాబును ప్రశ్నించాయి. ఢిల్లీ ఎక్సైజ్‌ విధానం, అమలులో బుచ్చిబాబు కీలక పాత్ర పోషించారని అనుమానాలున్నాయి.
2021 జూన్‌ లో బుచ్చిబాబు, అభిషేక్‌ బోయినపల్లి, అరుణ్‌ పిళ్లైతో కలిసి ఢిల్లీలో విజయగౌరి అపార్ట్‌మెంట్‌ లో ఆమ్‌ ఆద్మీ పార్టీకి చెందిన విజయ్ నాయర్ తో చర్చలు జరిపారని ఈడీ ఛార్జ్ షీట్ లో పేర్కొంది. ఐటీసీ కోహినూర్‌, మాగుంట శ్రీనివాసులు రెడ్డి నివాసం, తాజ్‌ మన్‌ సింగ్‌ హోటల్‌, ఒబెరాయ్‌ హోటల్‌ తదితర ప్రాంతాల్లో కూడా కీలక సమావేశాలు జరిగాయని తెలిపింది. మరోవైపు ఆదివారం సిసోడియాను అధికారులు విచారించనున్నారు.
