1986లో రాయల్ ఎన్‌ఫీల్డ్ బుల్లెట్ 350cc ధర ఎంతో తెలుసా? వైరల్ అవుతున్న బిల్!

బుల్లెట్టు బండికి ఉన్న క్రేజ్ గురించి ప్రత్యేకించి చెప్పాల్సిన పని లేదు. యువతలో ఈ బండికి ఎంత క్రేజ్ ఉంది అంటే.. ఈ బుల్లెట్టు బండి పేరుతొ వచ్చిన ప్రైవేట్ సాంగ్ ని కూడా సూపర్ హిట్ చేసేసారు. ఇక కుర్రకారుకి కూడా ఓ బుల్లెట్టు బండిని కొనుక్కోవడం అనేది లైఫ్ యాంబిషన్ గా మారిపోయింది. అయితే.. ఇప్పుడు బులెట్ బండి కొనాలంటే కనీసం లక్షన్నర పెట్టనిదే సెకండ్ హ్యాండ్ బండి కూడా రాదు. కొత్తది కొనాలంటే రెండున్నర లక్షల పైమాటే. కానీ.. ఒకప్పుడు అంటే పందొమ్మిది వందల ఎనభైలలో ఈ బండి ఖరీదు ఎంత ఉండేదో తెలుసా? ఇందుకు సంబంధించిన బిల్ ఒకటి నెట్టింట్లో వైరల్ అవుతోంది.

ఇది వింతగా అనిపించినప్పటికీ, జనవరి 23, 1986 నుండి బైక్ ధరను చూసి ప్రజలు ఆశ్చర్యపోతున్నారు. పాతకాలపు బైక్ ప్రియుడు ఒక వ్యక్తి ఈ బిల్ ను సోషల్ మీడియాలో పోస్ట్ చేసారు. అది ఇప్పుడు వైరల్ అవుతోంది. అక్కడ బుల్లెట్ ఇన్‌వాయిస్ రూ. 18,700 రూపాయలు ఉంది. ఇది 36 సంవత్సరాల క్రిందటి బిల్. ఇది జారీ చేసిన వారు సందీప్ అనే డీలరు. జార్ఖండ్‌లోని బొకారోలో ఆటో కంపెనీ వారు ఈ బైక్ ను డెలివరీ చేసారు.

ఆ సమయంలో బిల్లులో పేర్కొన్న బుల్లెట్‌ను కేవలం ఎన్‌ఫీల్డ్ బుల్లెట్ అని పిలిచేవారు. భారత సైన్యం ప్రాథమికంగా ఈ ఆధారపడదగిన మోటార్‌సైకిల్‌ను సరిహద్దు ప్రాంతాలలో పెట్రోలింగ్ చేయడానికి ఉపయోగించింది. ఈ పోస్ట్ కు విస్తృతంగా లికెస్ మరియు కామెంట్స్ వస్తున్నాయి. “”నా దగ్గర ₹ 16100 ధర కలిగిన 1984 ఫిబ్రవరి మోడల్ ఉంది. ఇప్పటికీ 38 సంవత్సరాలకు పైగా ఇది నా కంపానియన్..” అని ఓ యూజర్ కామెంట్ చేసారు. మరొక యూజర్ మేము 1980 లో ముంబై లో పదివేల ఐదు వందల మొత్తానికే కొన్నామని కామెంట్ చేయగా.. మరొక యూజర్ గోల్డెన్ డేస్ అంటే అవే.. అంటూ కామెంట్ చేసారు.