జగన్ ను కప్పతో పోల్చిన ప్రముఖ సింగర్!

ఆర్ఆర్ఆర్.. అంతర్జాతీయ వేదికపై సత్తా చాటిన చిత్రం. చిన్నా పెద్దా తేడా లేకుండా అందరి చేత తెలుగు నాటు స్టెప్పులు వేయించింది. అందుకే, నాటు నాటు పాటకు ఆస్కార్ దక్కింది. ఈ సందర్భంగా ఆర్ఆర్ఆర్ టీమ్ ను విష్ చేస్తూ సోషల్ మీడియాలో అనేకమంది ప్రముఖులు, సామాన్యులు పోస్టులు పెడుతున్నారు. అయితే.. ఏపీ సీఎం జగన్ చేసిన పోస్టు.. దానికి ఓ ప్రముఖ సింగర్ ఇచ్చిన కామెంట్ వైరల్ అవుతున్నాయి.

నాటు పాటకు ఆస్కార్ అవార్డు రావడంపై ఆర్ఆర్ఆర్ టీమ్ కు సీఎం జగన్ అభినందనలు తెలిపారు. తెలుగు పాటకు అస్కార్ రావడం చాలా సంతోషంగా ఉందని ట్వీట్ చేశారు. అయితే.. ఈ ట్వీట్ పై ప్రముఖ గాయకుడు అద్నాన్ సమీ తీవ్ర వ్యాఖ్యలు చేశాడు. తెలుగు ఖ్యాతి రెపరెపలాడుతోందన్న జగన్ వ్యాఖ్యలను తప్పుబట్టాడు. అంతటితో ఆగకుండా జగన్ ను చెరువులోని కప్పతో పోల్చాడు.

ప్రాంతీయ మనస్తత్వం కల చెరువులోని కప్ప కేవలం అక్కడ మాత్రమే చూస్తుందని, సముద్రాన్ని చూడలేదని కామెంట్ చేశాడు అద్నాన్ సమీ. ప్రాంతీయ విభజనలను సృష్టిస్తున్నందుకు, దేశానికి దక్కిన గౌరవాన్ని అందుకోలేకపోతున్నందుకు సిగ్గుపడు.. జై హింద్ అంటూ ట్వీట్ చేశాడు. అద్నాన్ పై వైసీపీ వర్గాలు ఎటాక్ మొదలు పెట్టాయి. సోషల్ మీడియాలో అతడ్ని ఓ ఆటాడుకుంటున్నాయి.

మాతృభాషతో అనుబంధం కలిగి ఉండటం కమ్యూనికేషన్ ఆలోచనల్లో ప్రాథమిక ధోరణి అని అద్నాన్ కు క్లాస్ పీకుతున్నారు. తెలుగును ఈ దేశానికి చెందిన భాషగా గుర్తించలేకపోతే ఇండియా గురించి మీరు చాలా నేర్చుకోవాలని కౌంటర్ ట్వీట్లు పెడుతున్నారు. సౌత్ సినిమాల డామినేషన్.. మరీ ముఖ్యంగా తెలుగు సినిమాలు సృష్టిస్తున్న ప్రభవంజనాన్ని తట్టుకోలేక బాలీవుడ్ ఏడుస్తోందనే ఆరోపణలు ఉన్నాయి. అందులో భాగంగానే అద్నాన్ ఇలా తన బాధను వ్యక్తం చేశాడని సెటైర్లు వేస్తున్నారు వైసీపీ శ్రేణులు.