Pushpa 2 The Rule: గరికపాటికి "పుష్ప 2" టీజర్ తో గట్టి పంచ్ ఇచ్చిన సుకుమార్

స్టార్ డైరెక్టర్ సుకుమార్ – స్టైలిష్ స్టార్ అల్లు అర్జున్ కాంబోలో తెరకెక్కిన చిత్రం ” పుష్ప ది రైజ్”. ఎర్రచందనం స్మగ్లింగ్ నేపథ్యంలో తెరకెక్కిన ఈ చిత్రం దేశవ్యాప్తంగా అదిరిపోయే కలెక్షన్లతో అఖండ విజయాన్ని సాధించింది. ఇక “పుష్ప ది రూల్” కోసం అభిమానులు ఎంతో ఆసక్తిగా ఎదురుచూస్తున్నారు. ఇదిలా ఉంటే.. ప్రముఖ ప్రవచనకర్త గరికపాటి నరసింహారావు గురించి మీకు అందరికీ తెలిసే ఉంటుంది. మామూలుగా ప్రవచనాలు అన్న, ఉపదేశాలు అన్న పెద్దగా ఇష్టపడని యువతకి ప్రవచనాలు అంటే ఇంట్రెస్ట్ కలిగేలా చేశారు గరికపాటి. ఆయన వల్లే ప్రస్తుతం చాలామంది ప్రవచనాలకు అలవాటు పడ్డారు. అయితే ఈ పుష్ప చిత్రం విడుదలైన సమయంలో ఈ సినిమాపై ఫైర్ అయ్యారు గరికపాటి.

ఈ చిత్రంపై ఆయన తీవ్ర అభ్యంతరం వ్యక్తం చేశారు. ఆయన ఏమన్నారంటే.. ” ఇటీవల కాలంలో సినిమాలు ఎలా వస్తున్నాయో తెలుసు. రౌడీ, ఇడియట్ అంటూ వస్తున్నాయి. ఈమధ్య వచ్చిన పుష్ప సినిమాలో హీరో స్మగ్లర్. అంటే స్మగ్లింగ్ చేసేవాళ్లను మంచిగా చూపించారు. అదేంటని అడిగితే చివరలో మంచిగా చూపిస్తాం, లేదంటే పుష్ప 2 తీస్తాం, లేదంటే మూడో పార్ట్ తీస్తాం అంటున్నారు. అంటే నువ్వు తీసే వరకు ఇక్కడ సమాజం చెడిపోవాలా? ఈ సినిమా కారణంగా స్మగ్లింగ్ గొప్పదనే భావన రాలేదా? అంతేకాకుండా స్మగ్లింగ్ చేసేవాడు “తగ్గేదేలే” అంటాడా.. ఆ డైలాగ్ పెద్ద ఉపనిషత్తు సూక్తి అయిపోయింది” అని ఆయన తీవ్రంగా ఖండించారు. అయితే తాజాగా అల్లు అర్జున్ పుట్టినరోజు సందర్భంగా పుష్ప 2 కి సంబంధించి టీజర్ ని విడుదల చేసిన విషయం తెలిసిందే. ఈ టీజర్ ద్వారా గరికపాటికి సుకుమార్ గట్టి కౌంటర్ ఇచ్చాడని సోషల్ మీడియాలో ఓ వార్త వైరల్ గా మారింది. ఈ టీజర్ లో తిరుపతి జైలు నుంచి తప్పించుకున్న పుష్పపై పోలీసులు 10 రౌండ్ల కాల్పులు జరిపినట్లుగా చూపిస్తారు.

ఆ తర్వాత అడవిలో దొరికిన పుష్ప చొక్కా పై 8 బుల్లెట్లతో కనిపించడం.. పుష్ప బాడీ దొరకకపోవడంతో చిత్తూరు జిల్లా మొత్తం అట్టుడికిపోతుంది. జనమంతా పుష్ప కోసం స్వయంగా ఆందోళనలు చేయడం ఈ టీజర్ లో చూపించారు. ఈ క్రమంలోనే పుష్ప చేసిన మంచి పనులు అన్నింటిని గుర్తు చేసుకుంటారు జనాలు. పుష్ప ఓ చిన్న కుర్రాడికి చేయించిన గుండె ఆపరేషన్, పెళ్లిళ్లు, సహాయాలను, జనాలకు ఎన్నో కోట్లు ఖర్చుపెట్టి వాళ్ళ గుండెల్లో పుష్ప నిలిచిపోయాడు అన్నట్లుగా చూపించారు. పుష్ప బతకాలని పూజలు చేసి, అతనిపై జనాలకి ఉన్న అభిమానాన్ని చూపించారు. దీంతో మొదటి భాగంలో విలన్ గా ఉన్న పుష్ప రెండవ భాగంలో హీరోగా మారిపోయాడని.. సుకుమార్ అలా మార్చేశాడని అంటున్నారు. అతడు చేసింది స్మగ్లింగ్ అయినప్పటికీ.. జనాలకి మంచి చేసినట్లుగా ఈ టీజర్ లో చూపించారు. ఈ టీజర్ తో గరికపాటికి దెబ్బ బాగానే తగిలినట్లు ఉందని, గరికపాటి దెబ్బకు సినిమా స్టోరీ కూడా మారిందని నెటిజెన్లు పలు రకాలుగా కామెంట్స్ చేస్తున్నారు.

Related posts:

About anji