"వాల్తేరు వీరయ్య" vs "వీర సింహారెడ్డి"..! దీని ప్రకారం సంక్రాంతి విన్నర్ అయ్యే సినిమా ఇదేనా..?

మెగాస్టార్ చిరంజీవి, నటసింహ నందమూరి బాలకృష్ణ.. ఈ ఇద్దరు హీరోలకి తెలుగు రాష్ట్రాలలో మాస్ ఫాలోయింగ్ ఏ రేంజ్ లో ఉందో ప్రత్యేకంగా చెప్పనక్కర్లేదు. అయితే ఇండస్ట్రీలో ఒక హీరో సినిమాతో మరో హీరో సినిమా పోటీ పడడం అనేది ఎప్పటినుంచో ఉంది. అందులో బాలకృష్ణ – చిరంజీవి సినిమాల పోటీ అంటే అభిమానులకు ఆ కిక్కే వేరు. ఈ నేపథ్యంలో ఈ సంక్రాంతికి కూడా చాలా పెద్ద సినిమాలు బాక్సాఫీస్ వద్ద పోటీ పడేందుకు సిద్ధమయ్యాయి. ఈ సంక్రాంతి బరిలో మెగాస్టార్ చిరంజీవి వాల్తేరు వీరయ్య, బాలకృష్ణ వీర సింహారెడ్డి చిత్రాలు కూడా ఉన్నాయి.

ఆరేళ్ల తర్వాత మరోసారి బాక్సాఫీస్ దగ్గర ఢీ అంటే ఢీ అనడానికి ఇద్దరు హీరోలు సిద్ధమయ్యారు. ఒక్కరోజు గ్యాప్ లో విడుదల కాబోతున్న ఈ రెండు సినిమాలను మైత్రి మూవీ మేకర్స్ నిర్మాతగా వ్యవహరించడం విశేషం. ఇదే కాకుండా ఈ రెండు చిత్రాలలోనూ ఈ సీనియర్ హీరోల సరసన శృతిహాసన్ హీరోయిన్ గా నటిస్తోంది. ఇప్పటివరకు ఈ ఇద్దరూ హీరోల చిత్రాలు బాక్సాఫీస్ వద్ద 8 సార్లు తలపడ్డాయి. వీటిలో చేరో నాలుగు సార్లు ఇద్దరూ విజయాలు నమోదు చేసుకున్నారు. అందులో ఇద్దరు హీరోలు మాస్ జానెర్ లోనే రాబోతుండడంతో అభిమానుల హడావిడి మామూలుగా ఉండదు.

అయితే ప్రస్తుతం ఆడియో పరంగా చిరంజీవి వాల్తేరు వీరయ్య ముందున్నా.. బాలకృష్ణ వీరసింహారెడ్డికే పాజిటివ్ వైబ్స్ ఎక్కువగా కనిపిస్తున్నాయి. అయితే చిరంజీవి గాడి ఫాదర్ చిత్రం కమర్షియల్ గా పెద్దగా హిట్ కాకపోవడంతో చిరు ఈ సినిమాపైనే ఆశలు పెట్టుకున్నాడు. మరోవైపు బాలకృష్ణ అఖండ వంటి భారీ విజయంతో మంచి జోష్ లో ఉన్నాడు. ఈ రెండు భారీ చిత్రాలను నిర్మించిన మైత్రి మూవీ మేకర్స్ మాత్రం ప్రమోషన్స్ విషయంలో అంతగా ఆసక్తి చూపించడం లేదు. మరి ఈ రెండు చిత్రాలలో ఏ చిత్రం ఘనవిజయాన్ని సాధిస్తుందో వేచి చూడాలి.