చంద్రబాబు, పవన్ పై రోజా ఆగ్రహం

తెలుగు రాష్ట్రాల్లో సూర్యుడు తన ప్రతాపాన్ని చూపిస్తున్నాడు. అయితే.. రాజకీయ నాయకులు ప్రత్యర్థులపై అంతకంటే ఎక్కువనే నిప్పులు కక్కుతున్నారు. ముఖ్యంగా ఏపీలో మంత్రి రోజా ప్రతిపక్ష నేతలపై ఓ రేంజ్ లో ఫైరవుతున్నారు. మాటకు మాట బదులిస్తూ సవాళ్లు కూడా విసురుతున్నారు.

ఈమధ్య ‘మా నమ్మకం నువ్వే జగన్‌’ అనే స్టిక్కర్ల కార్యక్రమానికి శ్రీకారం చుట్టింది వైసీపీ. ఇంటింటికి వెళ్తున్న వైసీపీ నేతలు జగన్ ఫోటోతో ఉన్న స్టిక్కర్లు అంటిస్తున్నారు. ఈ కార్యక్రమంలో ఫుల్ యాక్టివ్ గా పాల్గొని సోషల్ మీడియాలో పాజిటివ్ గా, నెగెటివ్ గా హల్ చల్ చేశారు రోజా. అయితే.. స్టిక్కర్ల వ్యవహారంపై ప్రతిపక్ష పార్టీలు విమర్శలు చేస్తున్నాయి. దీంతో రెచ్చిపోయిన రోజా.. విపక్ష నేతలను చెడామడా తిట్టిపారేశారు.

టీడీపీ అధినేత చంద్రబాబుకు సవాల్‌ విసిరారు రోజా. ఆయన దిగుతున్నది సెల్ఫీలు కాదు సెల్ఫ్ గోల్ వేసుకుంటున్నారన్న ఆమె.. ముసలి నాయకుడు మూలన కూర్చోకుండా ఇంకా కుట్రలు పన్నుతున్నారని ఫైరయ్యారు. కుప్పంలో అయినా, నగరిలో అయినా తాను సిద్ధం.. మీ మ్యానిఫెస్టో తీసుకుని రండి.. మా మ్యానిఫెస్టో తీసుకుని వస్తాను.. చంద్రబాబు చేసిన హామీల్లో ఎన్ని అమలు చేశారో చెప్పండి.. మేం చేసిన అభివృద్ధి ఏంటో చెబుతాను.. అప్పుడు ప్రజలు ఎవరితో సెల్ఫీ దిగుతారో చూద్దాం అంటూ రివర్స్ లో సెల్ఫీ ఛాలెంజ్ చేశారు.

మరోవైపు జనసేన అధినేత పవన్ కళ్యాణ్ పైనా తీవ్రస్థాయిలో మండిపడ్డారు రోజా. రుషికొండపై నిబంధనల ప్రకారమే కార్యక్రమాలు జరుగుతున్నాయన్నారు. అన్ని రకాల అనుమతులు తీసుకున్నామని.. పవన్ కళ్యాణ్ అవగాహన లేని వ్యక్తి అంటూ విమర్శించారు. రుషికొండ తవ్వకాలపై పవన్‌ ఈమధ్య చేసిన సెటైర్లు వైరల్ అయ్యాయి. తవ్వకాలను కప్పి పుచ్చేందుకు 151 అడుగుల స్టిక్కర్లను అంటిస్తారా? అంటూ పంచ్ వేశారు. ఈ నేపథ్యంలోనే రోజా ఇలా రియాక్ట్ అయ్యారు.